Subong nga Paskwa, ginpalab-ot ni House Speaker Ferdinand Martin Romualdez ang sinsero nga pagtamyaw sini sang Malipayon nga Paskwa sa kada pamilya nga Pilipino sa diin man nga bahin sang kalibutan.
Suno sa lider sang Kamara, subong nga panahon nagasimbolo sang kasadya, pagpasalamat, pagpamalandong kag tion agud magselebrar sang pagpalangga kag paghiliusa nga nagahigot sa tagsa isa bilang isa ka pungsod.
Ginbalikan man ni Speaker Romualdez ang mga pagtilaw nga gin-atubang sang pungsod, nagikan sa makahalalit nga bagyo kag iban pa nga kalamidan nga nagtilaw sa kabakod sang tanan tubtob sa mga gahod kag away pulitika, apang napabailin ang mabakod nga paghiliusa, pagtatap, kag pagpamalandong sang kada Pilipino.
Dugang pa sini nga indi nangin madali ang 2024 ilabi na para sa mga nadulaan kag nagapangatubang sang mga pagtilaw dala sang asud-asud nga mga kalamidad.
Samtang, nagalaum sa gihapon ini nga magadul-ong sang kasanag ang Paskwa kag kalinong, pagpalangga kag kasadyahan sa tagsa ka puluy-an kag tagipusuon.
