Ginpasiguro ni President Ferdinand “Bongbong” Marcos Jr. nga nagapabilin nga nagakaigo ang suplay sang pagkaon, petrolyo, kag abono sang pungsod sa pihak sang nagaluntad nga tensyon sa pangkalibutanon nga merkado.
Suno kay Marcos, nagapabilin nga normal ang presyo sang mga basic commodities kag petroleum products kon ipaanggid sa nagligad nga mga semana.
Padayon suno sa iya ang kooperasyon sang mga vendors agud mapabilin ang presyo, gani indi na kinahanglan nga mag-hoard kag mag-panic ang publiko.
Ginhatagan man pagtamod ni Marcos nga ang mayor nga tikang sang gobyerno sa pagbulig sa mga Pilipino, lakip na ang mga drivers, amo ang pagmentinar sang malig-on nga presyo kag suplay sang langis.
Dugang pa niya, ang gobyerno may gahum sa pag-adjust sang excise tax sa gatong kon kinahanglanon agud mapahagan-hagan ang mga gasto sang publiko, apang ini nagadepende sa paghulag sang pangkalibutanon nga merkado.
Katuyuan sang gobyerno nga mapabilin ang malig-on nga sitwasyon agud indi maapektuhan ang palangabuhian sang ordinaryo nga mga Pilipino.
