Target sang Department of Agriculture ukon DA ang pagbaligya sang humay sa P20 pesos kada kilo sa tuig 2028.
Kasunod ini sang mandu ni Presidente Ferdinand Marcos Jr sa ahensya nga himuon nga long-term endeavor ang pagbaligya sang barato nga bugas.
Suno kay Agriculture Secretary Francisco Tiu Laurel Jr., ang inisyal nga plano amo ang pagbaligya sang barato nga bugas tubtub Disyembre sini nga tuig ukon mahimo ini nga palawigon tubtub sa Pebrero sang masunod nga tuig.
Suno kay Laurel, nagkasugtanan sila sa sinapol kahapon nga adlaw upod sa Presidente nga ang mga pumuluyo sang Visayas ang makabakal sang 10 ka kilos sang barato nga bugas kada semana ukon 40 ka kilo kada bulan.
Suno sa iya, nadesisyunan nga ipatuman ang pilot implementation sang programa sa Visayas bangud madamo diri ang mas nagakinahanglan sang barato nga bugas.
Suno sa tiglikom, ang pagbaligya sang bugas sa balor nga 20 pesos kada kilo ang sa ulihi ipatuman sa bug-os nga pungsod.
Ginpasiguro man ni Laurel nga may yara sila sang bastante nga stocks ukon storage sang bugas sa rehiyon sang Visayas, lakip na ang syudad sang Iloilo.
Suno sa iya, sa kabug-usan, may ara sila sang 358,000 ka tonelada sang bugas sa ila nagkalain-lain nga bodega, nga kinahanglan suno sa iya nga i-release bangud harvest time na.
