Nagpanawagan si Presidente Ferdinand Marcos Jr., kaupod ang Department of Budget and Management (DBM) sa pagpanguna ni Secretary Amenah Pangandaman, sa tanan nga ahensya sang gobyerno nga himuon nga simple kag makahulugan ang pagsaulog sang Krismas kag Year-End sini nga tuig.
Kasunod ini sang serye sang mga kalamidad nga nag-igo sa pungsod.
Suno sa Presidente, ini nga tikang ang kabahin sang paghiliusa sang gobyerno sa mga Pilipino nga padayon nga naga-eksperyensya sang kabudlayan tuga sang mga kalamidad sining karon lang, lakip na ang mabaskog nga linog sa Visayas kag Mindanao, subong man ang mga bagyo nga nag-igo sa nagkalain-lain nga bahin sang pungsod.
Nagpahanumdom man ni Presidente Marcos Jr ang mga empleyado sang gobyerno nga mas importante ang espiritu sang paghatag kag pag-ulikid sa isigkatawo, ilabi na sa mga pamilya nga nagabangon pa sa kahalitan nga gintuga sang kalamidad.
Dugang pa sang DBM nga ang simple nga selebrasyon isa man ka paagi agud masiguro nga magamit sang husto kag epektibo ang pundo sang publiko, suno sa prinsipyo sang ekonomiko, responsable, kag makatawo nga pagdumala.
Ini nga panawagan kabahin sang handom sang administrasyon Marcos nga iduso ang “Bag-o nga Pilipinas” isa ka gobyerno nga inklusibo, mahinangpanon, kag matuod-tuod nga nagatinguha sa kaayuhan sang tagsa ka pumuluyong Pilipino.
