ROXAS CITY -Ginpasiguro sang Provincial Disaster Risk Reduction and Management Office ukon PDRRMO nga wala sang may makalusot nga “peke” nga mga medical certificate kag RT-PCR test results sa mga nagapauli nga mga Locally Stranded Individuals kag Returning Overseas Filipino sa probinsiya.
Ini ang ginpasalig ni Mrs. Judy Grace Pelaez, Provincial Disaster Risk Reduction and Management Officer sang mainterview sang Bombo Radyo.
Ginpahayag ni Pelaez nga maid-id ang PDRRMO sa pag-tsekyar sang mga medical certificates nga ginapresentar sang mga nagapalauli nga mga LSIs.
Gindugang pa ni Pelaez nga isa lamang ka lugar ang ginapatigayunan sang swab testing sa Metro Manila sa mga nagapalauli nga mga ROFs kag makita mismo sang in-charge kun negative ukon positive ang resulta sang test.
Samtang ginkompirmar ni Pelaez nga may yara sang duha ka mga LSIs nga nagpauli nga natukiban nga ginpeke ang ila nga Letter of Acceptance ukon LOA.
Mahibaluan nga may yara sang isa ka computer shop sa Metro Manila nga ginpasarado sang mga awtoridad bangud natukiban nga nagapameke sang tests results.
