Nagsumiter na ang Philippine General Hospital ukon PGH sa Sandiganbayan sang medical report ni anay House Speaker Martin Romualdez, nga nagaatubang sang non-bailable nga kaso nga plunder.
Ginapaabot nga mag-atubang sa Sandiganbayan subong nga Lunes si PGH Director Dr. Gerardo Legaspi ukon ang iya representante agud ipresentar ang resulta sang medical examination kag ipaathag kon kinahanglan pa palawigon ang confinement ni Romualdez.
Samtang, handa ang BJMP nga ibalhin gilayon si Romualdez sa Quezon City Jail kon ini ang imando sang korte kag ideklarar siya nga fit for transfer.
Si Romualdez ginbalhin sa PGH halin sa Cardinal Santos Medical Center sang Sabado para sa medical examination matapos magpagwa sang arrest warrant batok sa iya.
Nagaatubang siya sang P7.4-billion nga plunder case kaupod ang tatlo pa ka indibidwal, may kaangtanan sa ginapatihan nga kickback scheme sa mga flood control project.
Sa iya motion nga makapabilin sa ospital, ginpahayag ni Romualdez nga may yara siya sang Type 2 diabetes, hypertension, primary hypothyroidism kag iban pa nga balatian.
Suno sa BJMP, may sobra 3,200 ka PDL sa Quezon City Jail, nga may kapasidad nga tubtob 4,300.
May yara man sang 27 ka bakante nga selda sa bag-o nga gin-renovate nga building.
May in-house doctor, 24-hour nurses kag basic medical facilities man ang kulungan.
Samtang, ginpahayag sang BJMP nga mga doktor kag abogado ni Romualdez ang nagbisita sa iya halin sang ginbalhin siya sa PGH.
Ginapaabot man nga magkadto sa PGH subong nga Lunes sang aga si Pangulong Ferdinand Marcos Jr., apang wala pa ginpahayag ang rason sang iya pagbisita kay Romualdez.
