Padayon ang pagdabong sang industriya sang sugal sa Pilipinas matapos maka-record sang 26% nga pagtaas sa kabug-usan nga kita sa una nga anom ka bulan sang 2025, suno sa report sang Philippine Amusement and Gaming Corporation (PAGCOR).
Sa datos nga ginpaguwa sang ahensya, naglab-ot sa P214.75 billion ang gross gaming revenues (GGR) halin Enero tubtob Hunyo subong nga tuig, mas mataas kun ikumpara sa P171 billion sadtong kapareho nga period sang 2024.
Pinakadaku nga amot sa kita sang industriya ang electronic gaming sector — kalakip ang e-games, e-bingo, kag bingo grantees — nga nagpagkit sang P114.83 billion ukon 53.47% sang kabug-usan nga GGR.
Samtang, ang mga licensed casinos halin sa Metro Manila, Clark, Cebu, La Union, kag Rizal ang nag-amot sang P93.36 billion ukon 43.47% sang kabug-usan nga kita.
Ang mga casino naman nga direkta nga ginapadalagan sang PAGCOR nagdul-ong sang P6.56 billion, kabaylo sang 3.06% sang total revenues.
Bilang kabahin sang mas ginpasanyog nga regulasyon, gin-anunsyo man sang PAGCOR nga nagpirma ini sang agreement kaupod ang Ad Standards Council (ASC) agud pabaskugon ang pagbantay sa mga advertisement nga may kaangtanan sa sugal sa nagkalain-lain nga media platforms.
Kalakip sa mga tikang amo ang pagpasarado sang mga gambling ads sa mga pampubliko nga lugar kag primetime TV antes mag-abot ang Agosto 15, 2025.
