CAPIZ- Nakahightened-alert status na ang Philippine Coast Guard- Capiz bilang pagpanghanda sa Tropical Depression Verbena.
Sa interview sang Bombo Radyo kay Senior Chief Petty Officer Arnel Nisola, Deputy Commander sang Philippine Coast Guard- Capiz, iya ginpahayag nga kanselado na ang byahe sang barko biyahe gikan kag pakadto sa Culasi Port, Roxas City bangud sa pagpaidalum sa probinsya sang Capiz sa Tropical Cyclone Wind Signal No. 1.
Suno kay Senior Chief Petty Officer Nisola, nagpanugyan man ang ila talatapan sa mga magagmay nga sakayan-pandagat nga kun mahimo indi anay magpatunga sa kalalawran agud magpangisda bangud sa posible pagbaskog sang balod dala sang palaabuton nga bagyo.
Pahayag pa niya, padayon ang ang ila koordinasyon sa iban pa nga ahensya sang gobyerno agud nga magbuligay nga amligan ang tanan nga magakinahanglan sang bulig sa tion sang emerhensya.
Nagpanawagan man ang natungdan sa publiko nga mangin alerto bangud sa indi mapaktan nga lakat sang panyempo agud malikawan ang mga insidente.
Interviewed by: Bombo Jessa Mae Delos Santos via Bombohanay Bigtime
