Wala ginakaalarma sang Philippine Navy ang natukiban nga Chinese submarine drone sa Masbate sang Disyembre 30, 2024.
Sa isa ka pahayag, ginsiling ni PN spokesperson Rear Admiral Roy Vincent Trinidad nga kinhanglan pa nga ipaidalom sa dugang nga analysis ang yellow drone nga nakit-an nga nagalutaw-lutaw sa manabaw na bahin sang kadagatan sa banwa sang San Pascual, Masbate.
Ini agud matumod ang matuod nga ginhalinan sang amu nga drone, kalakip na ang technical specifications sini.
Gin-athag sang opisyal nga posible ini ang ginagamit sa reserach ukon ginagamit sa pag-track sang mga isda.
Suno kay Trinidad, ang mga masiri nga duag kasubong sang yeallow, red, kag orange ang kun kaisa ginagamit sa mga scientific research kag fishing activities kasubong sang tracking sa dalagkuan nga grupo sang mga isda.
Suno sa opisyal, indi ini dapat mangin rason sang pagka-alarma.
Ang pahayag sang PH Navy ang sa tunga sang mga spekulasyon nga ang narekober nga drone ang posible nga ginagamit bilang communication kag navigation toll sang China.
Una nga gintugyan sang Philippine National Police sa PH Navy ang amu nga drone, pila ka adlaw matapos ini nga makit-an sang pila ka mga manugpangisda sa kadagatan sang Barangay Inarawan, San Pascual, Masbate.
