Ginkumpirmar sang Philippine Embassy sa Israel ang kamatayon sang Filipina caregiver nga si Leah Mosquera, nga napatay bangud sa pilas nga naangkon sa Iranian missile attack sang Hunyo 15.
Suno kay Bombo International Correspondent Elvie Pregua nga direkta sa Israel, iya ginpahayag ang tuman nga kasubo sang komunidad sang mga Pilipino sa pungsod.
Ginlaragway niya si Mosquera bilang isa ka mapisan, mahigugmaon, kag mahipos nga tawo, nga nag-alagad bilang isa ka manug-atipan sa sulod sang halos duha ka dekada.
Si Mosquera nga magaselebrar kuntani sang iya ika-50 nga kaadlawan sa Hulyo 29 ang pinakauna nga kumpirmado nga Pinoy nga napatay may kaangtanan sa nagalala nga tensyon sa tunga sang Israel kag Iran.
Suno sa iya, sa pihak sang iya tuman ka sakit, wala siya ginbayaan sang iya utod nga babaye nga isa man ka OFW kag yara man sa Israel sang iya katapusan nga mga inadlaw.
Gindugang sini nga naga-coordinate subong ang Philippine Embassy sa Israel sa mga otoridad agud ma-areglo ang pagpauli sang iya bangkay.
Liwat nga nagpanawagan ang embahada sa mga Pinoy sa Israel nga maghalong kag mangin alerto, ilabi na sa tunga sang nagapadayon nga tensyon sa rehiyon.
