Nagapreparar ang transport group nga PISTON nga magpatigayon sang lapnagon nga transport strike bilang hugot nga protesta sa sunod-sunod kag padayon nga pagtaas sang presyo sang mga produktong petrolyo sa pungsod.
Suno kay PISTON National President Modesto Floranda, lubos nila nga ginasuportahan ang duha ka adlaw nga transport strike nga ilunsyar sang grupo nga MANIBELA umpisa Lunes, Setyembre 14; apang, ang iya grupo nagaplano man sang mas malawig nga protesta.
Ginpanindugan ni Floranda nga kulang ang fuel subsidy nga ginatanyag sang gobyerno sa mga drivers kag operators, samtang ginapabilin ang malig-on nga panindugan sang ila grupo nga dapat gilayon nga ibasura ang Oil Deregulation Law.
Gin-athag sang transport leader nga sa bug-os nga 28 ka tuig nga naga-epekto ang layi, padayon nga nagaantos ang mga drivers kag bug-os nga publiko sang Pilipino bangud sa kakulang sang kontrol sa nagataas nga presyo sang gatong sa merkado.
Nahibaluan nga liwat nga nagpaandam ang oil industry sa sunod-sunod nga pagtaas sang presyo sang petrolyo sa masunod nga semana, nga magadugang pa gid sang palas-anon sa sektor sang pampubliko nga transportasyon.
