Nagapabilin nga kabahin sang modernisasyon sang Armed Forces of the Philippines (AFP) ang plano sini nga pagbakal sang mga F-16 multi-role fighter jets.
Suno kay Philippine Air Force (PAF) Spokesperson Col. Ma. Consuelo Castillo, yara na sa talatapan sang Department of National Defense (DND) ang ila nga request nga makabakal sang amo nga mga fighter jets para sa ila nga mas moderno nga pagpatigayon sang mga patrolya sa kahawaan sang pungsod.
Paathag sini, ang mga fighter jets ang may yara sang mas makabag-o nga kapasidad kag kapabilidad bangud sa longer range kag mas mabaskog nga fire power sini.
Apisar yara na sa talatapan sang DND ang ila nga request, nagapabilin naman ini nga pending kag wala pa naaprubahan.
Samtang, tubtob nga wala pa sang sabat ang DND, padayon danay nga gamiton sang Sandatahang Lakas ang mga kagamitan nga may yara sila sa karon agud magamit bilang depensa sa maskin ano man nga posible pagpanghangkat sa seguridad sang pungsod.
