ROXAS CITY – Malipayon nga ginpahayag sang principal sang President Manuel A Roxas Memorial Integrated School South nga handa na sila para sa pagsug-alaw sa mga estudyante kadungan sang pagbukas sang klase, buwas nga adlaw, Agosto 22, 2022.
Sa pakig-angut sang Bombo Radyo kay Mrs. Irene Billones, Principal III sang PMRMS – South, suno diri sumugod sang nagtakup ang SY: 2021-2022, nag-amat-amat na preparar ang mga manunudlo sa paglimpyo sang mga classrooms kag mga galamiton sa limited face to face classes sang mga kabataan.
Preparado na ang mga classrooms, manunudlo kag health sanitation nga lugar.
Suno kay Billones, masobra 2,000 nga mga kabataan ang naka-enroll, kag katunga lang sini ang maka-attend buwas bangud sa kakulangan sang classrooms kag bangko.
Hugot man nga ginapatuman sini ang health protocols agud malikawan ang pagnilapta sang covid-19 kag indi mabutang sa peligro ang ikaayong lawas sang mga estudyante kag mga teachers.
Samtang ginpahayag sini nga wala na halos sang pahuway ang mga manunudlo kag wala na na-enjoy ang bakasyon bangud sa madamo nga hilikuton sa eskwelahan.
Dugang pa ni Billones nga wala sini ginalauman ang pagtaas sang numero sang mga nagpa-enrol nga mga kabataan, duha ka tuig matapos ang paglupok sang pandemiya.
Gintuad man sini nga antes magsugod ang klase, may hinalaay na nga natabo kaupod ang mga ginikanan natuhoy sa mga dapat nga ekspektaron kag kun ano ang ubrahon agud mangin madinalag-on ang face to face classes.
PMRMS, handa na sa pagsug-alaw sa mga estudyante buwas nga adlaw; mga manunudlo wala na halos sang pahuway para sa pagpreparar sa pagbukas sang klase
-- ADVERTISEMENT --
