Pormal nga ginmanduan ni Philippine National Police (PNP) Chief Gen. Jose Melencio C. Nartatez, Jr ang tanan nga mga police commander sa pungsod nga magkoordinar sa natungdan nga ahensya sang gobyerno agud masiguro ang seguridad sa palaabuton nga fuel subsidy distribution.
Ginpaguwa sang national police chief ang direktiba matapos gin-anunsyo sang Department of Transportation (DOTr) sang Miyerkules nga magasugod na sa masunod nga semana ang distribution sang P5,000 nga financial assistance.
Una nga mabaton ini sang mga tricycle driver sa Metro Manila, kag pagasundan sang iban pa nga public utility vehicle (PUV) drivers kag operators sa mga probinsya.
Apisar nga masami ginapaagi sa fuel subsidy cards ang distribution system, gin-athag ni Nartatez nga may mga tion nga manual ang payout, ilabi na sa mga probinsya, gani kinahanglan gid ang presensya kag pagbantay sang kapulisan.
Ginalauman man nga linibo ka mga drivers ang makabenepisyo sa nasambit nga cash assistance.
Ang nasambit nga tikang ang ginpatuman sang gobyerno bilang sabat sa padayon nga pagtaas sang presyo sang mga produktong petrolyo bilang resulta sang nagalala nga tensyon sa Middle East.
