Ginpasalig sang Philippine National Police (PNP) nga makaboto sang luwas ang mga pumuluyo sang Pilipino sa adlaw sang eleksyon.
Ini ang ginpahayag ni PNP Chief PGen. Rommel Francisco Marbil sa publiko nga ang ila hanay ang magasiguro sa kaluwasan sang publiko umpisa subong nga adlaw.
Ginpahayag ni Marbil nga indi dapat magkabalaka ang publiko bangud yari ang pwersa sang kapulisan kag handa nga protektahan sila kag ang ila mga boto sa adlaw sang eleksyon.
Ginpasalig man sang hepe nga yara na sa full-force deployment ang ila hanay umpisa subong nga adlaw agud masiguro ang kaluwasan kag katawhay sa bug-os nga pungsod pila ka adlaw antes ang eleksyon.
Ginpahayag man sini nga base sa datos nga ila natipon gikan sa ila survey, 19% sang mga Pilipino ang nagapati nga dako ang papel sang PNP sa madinalag-on nga eleksyon subong nga tuig.
Ginpasalig man ni Marbil nga makaabot kag makapauli nga luwas ang mga botante antes kag pagkatapos nila magboto kag siguraduhon man nga yara sa luwas nga mga kamot ang sanctity sang ila mga balota.
Samtang, nagsugod subong nga adlaw ang full force deployment sang PNP sa diin 163,621 ka mga kapulisan ang iga-deploy sa bug-os nga pungsod para sa sini nga tuig nga eleksyon.
