Nagapanawagan ang environmental group nga untaton na ang pagmina sa Mt. Hamiguitan Mountain Range sa Davao Oriental nga ginapahayag isa ka protektado nga lugar kag ginakilala bilang UNESCO World Heritage Site.
Suno sa Interfacing Development Interventions for Sustainability (IDIS), mapaanggid sa Sierra Madre sang Luzon ang Mt. Hamiguitan bangud sa importante nga papel sini agud mabuhinan ang epekto sang kalamidad, partikular ang bagyo.
Pahayag ni IDIS Program Coordinator, Enp. Lemuel Manalo, bugana sa biodiversity ang Mt. Hamiguitan kag nagabulig agud protektahan ang mga komunidad sa Davao Oriental, lakip ang Governor Generoso, San Isidro, Mati City, kag mga malapit nga lugar, sa tion sang pagbaha kag bagyo.
Apang, nangin pamahog sa kabukiran ang mga ginahimo nga pagmina partikular sa Barangay Macambol, Mati City.
Sang Oktubre , nagapaguwa ang provincial government sang mga laragway nga nagapakita sang ginabanta 200 hectares sang Mt. Hamiguitan ang naguba ukon nakalbo bangud sa pagmina.
Suno sa IDIS nga wala lamang nagaapekto sa mismo nga lugar ang pagkaguba sang Mt. Hamiguitan sa baylo nagahatag ini sang pamahog sa mga malapit nga protected zones lakip na ang Pujada Bay.
Nagapanawagan ang grupo sa mga otoridad nga indi na pag i-renew ang mga mining license agud maproteheran kag makaginhawa man ang kabukiran.
