Nakabalik na si Presidente Ferdinand Marcos Jr sa Pilipinas sang Biyernes sang gab-i matapos ang state visit sa India, nga iya gintawag nga “good friend and now, strategic partner” sang pungsod.
Naghugpa si Marcos alas 8:06 sang gab-i kaupod ang mga opisyales nga nag-upod sa iya sa biyahe.
Suno sa iya, nagalaum nga ang kooperasyon sang Pilipinas sa India ang magadala sang progreso kag kauswagan sa magtimbang nga pungsod.
Suno kay Marcos, nakigkita siya kay Prime Minister Narendra Modi kag sa iya mga matag-as nga opisyal, sa diin ila gin-istoryahan ang konkreto nga mga pamaagi agud marealisar ang bug-os nga potensyal sang bilateral kag multilateral nga kooperasyon.
Gin-anunsyo sang Presidente ang pagsiguro sang 18 ka mga kasugtanan sa negosyo, nga nagalakip sang matuod nga mga pamuhunan nga nagabalor sang $446 bilyones kag nagapatubas sang interes para sa potensyal nga tubtob sa $5.8 bilyones sa mga yabi nga sektor pareho sang digital nga imprastraktura, renewable energy, healthcare, manufacturing, kag IT-BPM.
Suno sa iya, ang matuod nga mga pamuhunan ginalauman nga makahatag sang masobra 4,000 ka direkta nga trabaho, lakip ang dalagku nga mga trabaho nga may kaangtanan sa imprastraktura, manufacturing, kag mga proyekto sa renewable energy.
Agod madugangan ang posible nga mga kinahanglanon sa trabaho, si Marcos nagsiling nga ang India naghimo man sang mga pangako para sa digital upskilling nga nagabalor sang $11 milyones. Sa tuig 2026, indi magnubo sa 26,120 ka mga Pilipino ang ginalauman nga mahanas sa Artificial Intelligence, digital technologies, kag cybersecurity.
Nakigkita man si Marcos sa komunidad sang mga Pilipino kag naghatag sang Foreign Policy Address agud ipakita ang gin-ambit nga interes sang duha ka pungsod sa negosyo, pag-uswag, depensa, kag pangkalibutanon nga kinaandan.
