Ginaduso sang Senado ang isa ka hagna nga magatugot sa gobyerno sa pag-regulate sang industriya sang langis kag pagpatuman sang mga pagkontrol sa presyo agud maprotektahan ang mga konsumidor gikan sa nagapadayon nga krisis sa enerhiya.
Pormal na nga gin-file ni Senator Loren Legarda ang Senate Bill (SB) No. 2020, nga kilalahon bilang Bayanihan 3: Power to the People Act.
Ang hagna nagatuyo sa pag-institutionalize sang sabat sang pungsod sa krisis paagi sa paghatag sa Department of Energy (DOE) kag Department of Finance (DOF) sang otoridad sa pagdumala sang supply kag presyo sang petrolyo.
Magluwas sa oil regulation, ang SB No. 2020 magahatag man sang social aid kaangay sang fuel subsidies para sa transportation kag agriculture sectors, loan payment reliefs, kag bulig sa mga Overseas Filipino Workers nga nagapauli bangud sang krisis sa Middle East.
Suno kay Legarda, tinutuyo sang laye nga mapun-an ang kakulangan nga ginbilin sang Executive Order No.110 ni Presidente Ferdinand Marcos Jr.
Apisar nga nagdeklara ini sang national energy emergency, ginhatagan punto sang senador nga kulang sa direkta nga proteksyon ang ginapatuman subong nga polisa para sa mga konsumidor kag wala sang maathag nga timeline para sa gilayon nga aksyon sang gobyerno.
