Nakadakop ang Police Regional Office 6 Western Visayas sang 204 ka persona kag nakarekober ukon nakakumpiska sang environmental resources, fishing paraphernalia kag iban pa nga mga gamit nga nagabalor sang masobra P16.18 million sa ginpatigayon nga operasyon batuk sa illegal logging kag illegal fishing humalin Agosto 1 tubtob 15, 2026.
Suno sa PRO-6, nagpatigayon ang kapulisan sang 187 ka operasyon sa nagkalain-lain nga lugar sa Western Visayas sa pagpanguna ni Regional Director Brig. Gen. Randulf Tuaño.
Lakip sa mga narekober ukon nakumpiska amo ang lumber nga nagabalor sang P308,470.84, uling nga nagabalor sang P76,450, kag isda nga nagabalor sang P260,720.
Nakumpiska man ang fishing paraphernalia kag related items nga nagabalor sang P15.54 million.
Sa kampanya batuk illegal logging, nakapatigayon ang mga police unit sang 118 ka operasyon kag nakadakop sang 58 ka persona.
Ang Aklan nakarekord sang pinakadamo nga operasyon sa illegal logging nga naglab-ot sa 37, samtang ang Antique ang may pinakadamo nga nadakpan nga naglab-ot sa 40 ka persona.
Samtang, 69 ka operasyon naman ang ginpatigayon kontra illegal fishing, nga nagresulta sa pagkadakop sang 146 ka persona.
Ang Iloilo may yara sang 32 ka operasyon kag 82 ka nadakpan, nga amo ang pinakataas nga numero sa amo nga kampanya.
Suno kay Tuaño, nagapakita ang mga numero sang importansya sang padayon nga pagpatuman sang kasuguan, lakip ang maayo nga koordinasyon, agud maprotektahan ang natural resources sang rehiyon kag masuportahan ang legal nga palangabuhian sang mga komunidad.
Ginpanawagan man ni Tuaño ang publiko nga magkuha sang nagakaigo nga permits kag magsunod sa mga environmental kag fisheries regulations.
