Ginpasalig sang Police Regional Office-6 ang publiko nga pabaskugon pa ang police visibility sa mga eskwelahan sa Western Visayas kasunod sang makahalanusbo nga insidente sang school shooting sa Zamboanga City.
Suno kay Police Brig. Gen. Randulf Tuaño, direktor sang PRO-6, iya na ginmanduan ang tanan nga police units sa rehiyon nga magpadayon sa nagakaigo nga police visibility sa palibot sang mga eskwelahan, regular nga pagpatrolya, pagpabaskog sang information-gathering kag mas hugot nga koordinasyon sa mga school authorities.
Ginpahayag ni Tuaño nga ang mga police units sa Aklan, Antique, Capiz, Guimaras kag Iloilo, lakip na ang Iloilo City, magapadayon sang koordinasyon upod sa mga school administrator, local government units, mga ginikanan kag iban pa nga stakeholders.
Katuyuan sini nga mapunggan ang posible nga mga insidente nga makahatag peligro ukon makahalit sang kabuhi sa sulod kag palibot sang mga eskwelahan.
Nagapanawagan man si Tuaño sa mga ginikanan, guardians kag school authorities nga gilayon i-report sa mga otoridad ang bisan ano nga ginasuspetsahan nga aktibidad ukon pamatasan sang mga estudyante agud mahatagan ini sang nagakaigo nga intervention.
