CAPIZ-Ginpangunahan na sang Probinsya sang Capiz ang preparasyon para sa pag-host sang 2027 Western Visayas Regional Athletic Association (WVRAA) Meet, paagi sa pagsapol kag indicative planning sang nagkalain-lain nga ahensya kag stakeholders sa kapitolyo subong, Setyembre 17, 2026.
Sa pagpanguna ni Governor Fredenil H. Castro, kaupod sanday SDO Capiz Superintendent Dr. Roel F. Bermejo, CESO V; DepEd VI Regional Director Dr. Cristito Eco, CESO III; DepEd VI Assistant Regional Director Miguel Mac Aposin, CESO V; kag Vice Governor James Magbauna, ginkonsolida ang mga kinahanglanon kag ginplastar ang mga plano para sa pagpatigayon sang isa sa pinakamalapad nga regional sports events sa Western Visayas.
Kabahin sa ginatutukan ang pagpaayo sang billeting quarters kag sports facilities, agud masiguro nga luwas, komportable kag handa ini para sa mga atleta kag delegado. Ginalantaw man ang mga ginaproponer nga sports venues sa nagkalain-lain nga banwa kag ginaplastar ang pag-asister sang mga local government unit sa pag-accommodate sang mga delegasyon sa mga billeting schools.
Ginapreparar man ang accomodation sang mga tournament officials, sports equipment, transportation kag iban pa nga logistical requirements nga kinahanglanon para sa hapsay nga pagpatigayon sang mga kompetisyon. Pinaagi sa early planning, ginatuyo sang mga organizers nga ma-identify kag masolbar ang mga kinahanglanon antes mag-abot ang mga delegado.
Base sa kasamtangan nga plano, ginalauman nga pagahiwaton ang 2027 WVRAA Meet sa Capiz halin Marso 29 tubtob Abril 2, 2027, nga pagapartisipahan sang ginabanta nga 7,665 ka atleta, coaches, assistant coaches, chaperons kag iban pang delegado gikan sa lima ka probinsya sa Western Visayas.
Para naman sa SDO Capiz, ginapaabot ang 713 ka participants, lakip ang mga atleta, coaches, assistant coaches kag chaperons, samtang 113 ka opisyal sang SDO Capiz ang magasuporta sa delegasyon.
Padayon naman ang pagplastar sang mga detalye kag koordinasyon sang probinsya kag DepEd agud masiguro nga handa ang mga pasilidad, billeting areas kag logistical requirements sa pag-abot sang mga atleta kag delegado para sa 2027 WVRAA Meet.
