Nagapanawagan ang Philippine Statistics Authority (PSA) Western Visayas sa publiko nga i-report ang government office ukon private establishment nga wala nagabaton sang National ID bilang proof of identity.
Sa interview sang Bombo Radyo kay Jared Xerxes Barile, Registration Officer III sang PSA Western Visayas, iya ginpahayag nga ang tanan nga sahi sang National ID ang dapat nga batunon.
Ini ang ginalakipan sang physical National ID card, paper-printed National ID, kag ang Digital National ID nga mahimo ipakita gamit ang mobile phone.
Suno kay Barile, i-report ang ano man nga kaso sang non-acceptance sang National ID sa PSA pinaagi sa pag-email sa info@philsys.gov.ph ukon magtawag sa PhilSys hotline sa 1388.
Kinahanglan nga ilakip sa report ang petsa sang transaksyon, pangalan sang establisimento, ang rason kun ngaa wala ginbaton ang National ID kag ang sahi sang transaksyon nga involved.
Sa idalom sang Republic Act No. 11055, ang government agencies kag private entities nga wala nagabaton sang National ID ang mahimo dagdagan sang penalidad nga P500,000 tubtob P1 million kag pagkapreso sang tatlo tubtob anom ka tuig, depende sa sirkumstansya.
