PONTEVEDRA, CAPIZ – Patay ang myembro sang First Capiz Provincial Mobile Force Company matapos ginluthang sa videoke bar sa Barangay Binuntucan, Pontevedra, Capiz.
Ang biktima amo si Police Capt. Rian Ampoyos, 48 anyos kag residente sang Barangay Swa, President Roxas, Capiz.
Ang suspek naman amo si William Deocampo, 38 anyos kag residente sang Barangay Jolongajog, Pontevedra, Capiz.
Sa initial nga imbestigasyon sang Ponteveda PNP, nagresponde lang si Capt. Ampoyos upod sa duha ka mga pulis bangud may nagluntad nga kinagamo sa videoke bar apang siya pa ang ginluthang sang suspek sa dughan.
Nadakpan man si Deocampo apang gindala sa ospital bangud sa mga naangkon nga pilas kasunod sang pagsaputi sa iya sang mga tawo.
Na-recover sang kapulisan ang .45 caliber pistol nga gingamit sang suspek sa pagpangluthang.
Sa pagpangusisa sang Bombo Radyo, ginaalegar may yara sang criminal record ang suspek.
Padayon naman ang imbestigasyon sang Pontevedra PNP.
