Ginpangunahan sang mga matag-as nga opisyal sang gobyerno ang pag-usisa sa Tripa De Gallina pumping station sa syudad sang Pasay bilang kabahin sang ginpabaskog nga tikang sang gobyerno batok sa pagbaha sa Metro Manila.
Nagtambong sa aktibidad sanday Transportation Secretary Vince Dizon, Budget Secretary Amenah Pangandaman, Information and Communications Technology Secretary Henry Aguda, MMDA Chairman Atty. Romando Artes, kag Pasay City Mayor Emi Calixto.
Kadungan sang pagbisita sa lugar, ginlunsar ang mayor nga components sang Flood Control Project (FCP) nga nagatuyo nga mapabaskog ang kapasidad sang pumping stations kag drainage systems sa mga flood prone areas.
Isa sa mga bahin sang aktibidad amo ang seremonyal nga pagpirma sang Memorandum of Understanding for Digital Information for Monitoring and Evaluation (DIME), isa ka inisyatibo nga maga-introduce sang digital tools para sa real-time monitoring sang flood control infrastructure.
Ang Tripa De Gallina pumping station ang isa sa mga nagapanguna nga pasilidad sa Pasay nga nagasabat sa pagbaha, ilabi na sa tion sang tig-ululan.
Sang nagligad nga mga tinuig nangin hangkat sa Metro Manila ang madasig nga pagtaas sang tubig tuga sang mabaskog nga pag-ulan, pagginutok sa kasyudaran, kag kakulang sang pagmentinar sang drainage.
Paagi sa FCP kag DIME, tuyo sang gobyerno nga mapaayo ang kahandaan sa kalamidad, mapadasig ang oras sang pagsabat, kag masiguro ang transparency sa pagpatuman sang mga tikang sa pagpahaganhagan sang baha.
Ang katuyuan sang proyekto amo ang paggamit sang digital nga teknolohiya para sa mas epektibo nga pagbantay sang mga pumping stations, pagpabaskog sang koordinasyon sang mga ahensya sa pagsabat sa mga emerhensya kag paghatag sang data-driven evaluation para sa mas maayo nga pagdumala sang mga pundo kag mga proyekto.
Ang ini nga lihok ang kabahin sang mas malapad nga programa sang administrasyon para sa climate resilience kag disaster risk reduction, nga nagatuyo nga maproteksyunan ang mga komunidad sa Metro Manila kag iban pa nga mga lugar sa pungsod nga masami gina-igo sang pagbaha.
