ROXAS CITY – Ginapanindugan sang isa ka lalaki nga may ‘’multiple disability’’ nga nabutang sa kontrobersiya sa karon nga nakabaton ini sang P6,000 nga Social Amelioration Program (SAP) sang gobyerno, apang ginbawi sang Department of Social Welfare and Development.
Liwat nga nagpadulong sa Bombo Radyo broadcast center si Mr.Jovanie Candelario sang Sitio Talaba, Barangay Pawa, Panay agud sabton kag klaruhon ang ginbuy-an nga komento ni Barangay Kapitan Edilberto Bandejas kaina sang aga nga nagahimo himo lamang ini sang estorya.
Suno kay Candelario nga antes gin-release sa iya ang kantidad nga 6mil pesos ginpapirma pa ini sang apat ka kopya nga mga dokumento.
Apang sang ginbawi na ang kantidad suno sa tagreklamo nga nag-apelar pa ini sa DSWD nga nagpanugyan sa iya nga kadtuan ang ila punong barangay kag kun magpasugot ini, ila iga-release ang kwarta.
Apang nadismaya si Candelario bangud wala nagpasugot ang punong barangay nga maka-ambit siya sang bulig sang gobyerno.
