Nagahimo na sang tikang ang Roxas City Government sa problema sa basura nga ginahaboy sa sanitary landfill adlaw-adlaw.
Sa interview sang Bombo Radyo kay Mr. Melvin Galagate, head sang Roxas City Communications Group, iya ginpahayag nga isa sa mayor nga rason sang problema amo ang waste segregation sang pila ka mga pumuluyo bangud dapat ibilin na ang recyclable materials sa mga panimalay para sa proper collection kag processing kag wala na ginadala pa sa sanitary landfill.
Apang daw kaangay nga nagakapaslawan ang mga pumuluyo nga sundon ang proper waste segregation suno sa iya rason nga mabudlay para sa city government nga ma-manage ang mga basura nga nagtuga sang madasig nga pagkapuno sang sanitary landfill.
Agud mahagan-hagan ang basura nga madala sa landfill, nag-umpisa ang local government sa pagpatukod sang pyrolysis facility nga ginatawag Pyroguard.
Ang proyekto ang ginabanta yara na sa 90% complete kag ginalaragway bilang first zero-waste facility sa Capiz ukon mangin sa Western Visayas.
Ginakabig nga safe ang teknolohiya bangud ang proseso sini wala naga-produce sang aso ukon baho.
Pahayag ni Galagate, ini ang magaproseso sang basura kag himuon nga mapuslanon nga byproducts sa diin isa diri amo ang abo, nga mahimo gamiton agud maghimo sang materyales kaangay sang bricks kag hollow blocks.
Naga-umpisa naman ang syudad sa pagpain sang biodegradable kag non-biodegradable waste bilang kabahin sang pagpanikasog agud ma-improve ang waste management.
Ang pilot barangay amo ang Culajao bangud sa ila efforts sa waste segregation, paggamit sang materials recovery facility kag ang pagproseso sang organic waste nga mangin fertilizer.
Nagpahanumdom si Galagate sa publiko nga ang pagsolbar sang problema sa basura ang indi lang katungdanan sang city government kundi mangin sang kada panimalay kag barangay.
