Gin-aprubahan sang Commission on Elections (Comelec) ang desisyon nga nagabasura sa disqualification case nga gin-file batuk kay Kingdom of Jesus Christ founder kag leader Pastor Apollo Quiboloy.
Sa ginpaguha nga resolusyon sang poll body, ginbasura ang motion for reconsideration nga gin-file sang petitioner nga si Atty. Sonny Matula kag sang Workers and Peasant’s Party ukon WPP bangud sa kakulangan sang merito.
Base sa gin-file nga mosyon nanday Matula, ginapa-disqualify si Quiboloy bangud sa pag-file sini sang certificate of candidacy sa idalom sang WPP apisar nga indi awtorisado ang nakahamtang sa iya certificate of nomination and acceptance nga makabig nga material misrepresentation.
Pero sa sabat sang kampo ni Quiboloy, apisar nga wala sang awtoridad si Atty. Mark Tolentino nga kumatawan para sa WPP, indi gihapon ini grounds para ma-disqualify ang isa ka kandidato sa idalom sang layi.
Moot and academic na man ang isyu ilabi na nga magapapili na si Quiboloy bilang isa ka independent candidate.
Maluwas diri, indi man dapat ideklarar nga nuisance candidate ukon panggulo lamang si Quiboloy bangud lamang may ginapangatubang ini nga kaso.
Suno naman sa Comelec, wala sang valid ground sa gin-file nga mosyon kag gintugutan ang pagtakbo ni Quiboloy bilang senador sa 2025 midterm elections.
Sa karon, nakahunong si Quiboloy bangud sa mga reklamo nga child abuse kag human trafficking.
