Nangin madinalag-on ang bag-o nga resupply mission sang BRP Sierra Madre sa Ayungin shoal.
Ang rotation and resupply (RoRe) mission ginpatigayon sang Mayo 16 sa kooperasyon sang Philippine Coast Guard (PCG). Diri, gindul-ong sang mga tripulante sang MV Lapu-Lapu ang mga pagkaon kag suplay sa mga tropa nga nadestino sa BRP Sierra Madre.
Suno sa Philippine Navy, wala sang may narekord nga untoward incident, gani ini na ang ika-walo nga sunod-sunod nga operasyon nga wala sang obstruction.
Suno sa PN spokesperson for the West Philippine Sea Rear Admiral Roy Vincent Trinidad, apat ka mga barko sang Chinese Coast Guard ang nasiplatan sa lugar apang wala sila sang agresibo nga aksyon.
Ginpahayag man sini nga wala sang nakita nga mga sakayan pandagat sang Chinese maritime militia sa palibot sang Ayungin shoal.
Ginhatagan punto sang opisyal nga indi kinahanglan sang Pilipinas nga magpangayo sang pahanugot sa sin-o man nga dumuluong, ilabi na sa isa nga nagpahilabot sa aton exclusive economic zone, gani suno sa iya magapadayon ang resupply missions.
Ginpahayag man ni Trinidad nga ang madinalag-on nga resupply mission nagapamatuod sang commitment sang militar sa paghatag sang padayon nga suporta para sa tropang Pilipino nga nadestino sa BRP Sierra Madre kag pag-uphold sang soberanya kag soberanong kinamatarong sang Pilipinas.
