ROXAS CITY -Magapatigayon sang inspeksyon ang Sangguniang Panlungsod sa mga kasubaan nga sakup sang siyudad sang Roxas.
Ini ang ginkompirmar ni City Councilor Moreno Gonzaga sang mainterview sang Bombo Radyo.
Suno kay Gonzaga nga ginkasugtanan sa iya ginpatawag nga sinapol nga magapatigayon sila sang inspeksyon sa mga kasubaan nga sakop sang siyudad kasunod sang ginpalab-ut sini nga reklamo natuhoy sa presensiya sang madamo nga mga basura sa Panay River.
Magluwas diri, gindugang pa ni Gonzaga nga magapatigayon sila sang clean up drive agud makuha ang mga basura nga ginhaboy sa mga kasubaan.
Ginkalipay man sini ang pagtambong sa mga barangay officials nga may yara sang papel agud matapna ang madugay na nga problema sang siyudad angut sa paghaboy sang basura sa mga kasubaan.
Ginatinguhaan man sa karon ni Gonzaga nga hatagan sang penalidad ang sin-o man madakpan sa akto nga nagahaboy sang basura sa mga kasubaan.
Mahibaluan nga kalakip sa mga nagtambong sa nasambit nga sinapol amo sanday City Councilor Midelo Ocampo, City Councilor Jericho Celino, Former City Councilor Matthew James Viterbo, CPPO-Provincial Director Police Colonel Julio Gustilo Jr., mga katapo sang Philippine Coast Guard kag mga barangay officials.
Matandaan nga una na ginpalab-ut ni Gonzaga sa konseho sang siyudad ang nakita sini nga problema angut sa presensiya sang mga basura sa mga kasubaan.
