Ginpasidunggan sang Bureau of Local Government Finance (BLGF) Region VI ang Roxas City bilang champion sa mga component cities sa rehiyon bangud sa mataas nga koleksyon sang locally sourced revenue halin sa business tax kag other taxes.
Sa interview sang Bombo Radyo kay Agnes Alvarez, Acting City Treasurer sang Roxas City, iya ginpahayag nga ang nasambit nga award nagapakita sang epektibo nga pagtrabaho kag pagbinuligay sang nagkalain-lain nga opisina sa pagkolekta sang tax agud malab-ot ang target sang BLGF.
Suno kay Alvarez, dako nga bahin sang revenue sang siyudad ang nagahalin sa business taxes kag real property taxes, nga ginapatuman paagi sa husto nga pagkolekta, pagdeposito kag regular nga check and balance agud masiguro ang transparency kag accountability.
Nagpasalamat man ang natungdan sa mga establisemento kag taxpayers nga nag-amot sa mataas nga koleksyon sang tax kag sa pagkabaton sang nasambit nga pagkilala.
