Gindayaw kag ginpasalamatan sang Roxas City Government ang mga Barangay Health Workers (BHWs) sa ila padayon nga sakripisyo, dedikasyon, kag boluntaryo nga pagserbisyo para sa ikaayong-lawas sang mga pumoluyo sang syudad.
Sa interview sang Bombo Radyo kay Mr. Melvin Galagate, head sang Roxas City Communications Group, iya ginpahayag nga ginakalipay gid sang city government nga nakabaton sang insentibo ang mga BHWs sang syudad bilang pagkilala sa ila importante nga kontribusyon sa komunidad.
Suno kay Galagate, kabug-osan nga P1.7 million ang gintalana para sa PhilHealth Konsulta Package Performance Incentive sa diin gintunga ini sa 1,098 ka BHWs sa Roxas City, nga nagbaton sang P1,621.65 kada isa.
Dugang pa sang natungdan, ang insentibo isa ka porma sang pagpasalamat kag pagkilala sang lokal nga panguluhan sa importante nga papel sang mga BHW sa pagpatuman sang mga programa sa ikaayong lawas kag pagserbisyo sa mga pumoluyo.
