Madinalag-on nga natapos ang una nga international basketball tournament sa Roxas City.
Sa interview sang Bombo Radyo kay Mr. Melvin Galagate, Head sang Roxas City Communications Group, iya ginpahayag nga nangin positibo ang reaksyon sang mga tumalan-aw kag bisita, ilabi na bangud sa pagpartisipar sang mga kilala nga UAAP teams kag duha ka teams nga naghalin pa sa Australia.
Lakip sa mga nagpartisipar ang Adamson Soaring Falcons, De La Salle University Green Archers, University of Perpetual Help System DALTA Altas, UAC Keysborough kag Brian Kerle Basketball Academy.
Suno kay Galagate, isa ka daku nga achievement ang paghiwat sang amo nga international sporting event sa syudad bangud indi lamang ini naghatag sang kalingawan kundi nakabulig man sa pag-promote sang Roxas City bilang sports destination.
Dugang pa sang natungdan, ang ini nga inisyatibo sang Roxas City Government ang mahimo nga mangin una nga tikang sa pag-host sang mas madamo pa nga international kag world-class sporting events sa Dinggoy Roxas Civic Center sa palaabuton.
