CAPIZ – Ginaduso ni Senator Christopher “Bong” Go nga i-upgrade ang Roxas Memorial Provincial Hospital sa Roxas City, Capiz nga mangin Level III general hospital kag pangalanan bilang Capiz Medical Center sa idalom sang Department of Health (DoH).
Nag-file ini sang Senate Bill No. 2324 nga nagahingyo nga palapadon pa ang medical services, pasilidad, workforce kag bed capacity sang ospital agud masabat ang nagadako nga kinahanglanon nga healthcare sang mga pumuluyo sang Capiz.
Sa subong, yara sa Level II government hospital ang Roxas Memorial Provincial Hospital nga amo ang nagaserbe bilang primary public healthcare facility sang probinsya.
Sa idalom sang layi, ang DOH, sa koordinasyon sang Capiz provincial government, ang magapreparar sang transition plan sa sulod sang 180 days para sa renationalization sang ospital.
Ang proposal ang nagapanawagan man sang dugang nga mga doctor, nurses kag support staff, sa diin ang pondo ang posible ilakip sa annual General Appropriations Act.
