Gintawag ni Senador Francis Pangilinan nga isa ka insulto sa Pilipinas kag dugang nga pagpamigos sang China sa isyu sang West Philippine Sea ang ginpapanaog nga sanctions batok kay Defense Secretary Gilberto Teodoro Jr.
Bangud sini, ginhingyo ni Pangilinan ang Department of Foreign Affairs (DFA) nga magsumiter sang pormal nga protesta matapos ginbawalan si Teodoro kag ang iya pamilya nga magsulod sa China, Hong Kong kag Macau.
Suno sa senador, ang tikang sang China isa ka pag-atake sa soberano nga desisyon sang Pilipinas bangud ang mga pahayag ni Teodoro nagarepresentar sang opisyal nga polisiya sang gobyerno sang Pilipinas.
Dugang pa niya, ang paghatag penalidad sa secretary kag sa iya pamilya isa man ka paglapastangan sa Presidente, sa estado kag sa Konstitusyon sang Pilipinas.
Sa pihak nga bahin, ginsiling sang China nga ginhatag nila ang sanctions bangud sa padayon nga iresponsable nga mga pahayag ni Teodoro nga nakaapekto sa interes sang Beijing kag sa relasyon sang duha ka pungsod.
Apang ginpahayag ni Pangilinan nga ang pagsilot sa isa ka miyembro sang Gabinete tungod sa pagdepensa sini sa 2016 arbitral ruling kag sa mga kinamatarung nga ginakilala sang international law, nagapakita lamang sang mas naganubo nga kredibilidad sang China sa international nga komunidad.
