Ginbalibaran sang Sandiganbayan ang bail petition sang siyam ka anay opisyal sang Department of Public Works and Highways (DPWH) kag co-accused nga si former Ako Bicol Party-list Rep. Zaldy Co.
Nagapangatubang ang mga ini sang kaso nga malversation may kaangtanan sa gina-alegar substandard nga P289 million nga flood control project sa Oriental Mindoro.
Sa 41 ka pahina nga resolusyon, ginpahayag sang anti-graft court nga mabakod ang ebidensya nga ginpresentar sang prosekusyon batuk sa akusado.
Suno sa Sandiganbayan, ang pag-aprubar kag pagsertipikar sang pila ka mga opisyal sang disbursement vouchers ang nagresulta sa pag-release sang P215 million pabor sa contractor nga Sunwest, Inc.
Gindugang pa sang korte nga may yara sang maathag nga ebidensya nga gin-alegar gintugutan sang akusado ang kontraktor nga makuha ang pondo pinaagi sa sala nga mga pahayag sa project report.
Gin-athag sang Sandiganbayan nga ang pagbalibad sa piyansa wala nagakahulugan nga guilty ang mga akusado, kundi base lamang sa kabug-aton sang mga ebidensya nga ginsumite para sa katuyuan nga magdesisyon sa piyansa.
