Ginmandoan sang Sandiganbayan ang Bureau of Jail Management and Penology (BJMP) nga i-commit bilang detention prisoner si anay House Speaker Martin Romualdez samtang nagapangatubang sa kaso nga plunder may kaangtanan sa ginalegar nga P7.4 billion nga kickback scheme sa mga government infrastructure project.
Ang commitment order ginpaguwa sang Third Division sang Sandiganbayan kag gin-address kay Jail Superintendent Maria Pacion, jail warden sang BJMP sa Quezon City Jail-Male Dormitory.
Gintalana man sang korte ang arraignment kag pretrial ni Romualdez sa Setyembre 14.
Samtang, gin-talakay sa separado nga hearing sang Sandiganbayan ang kahimtangan sang panglawas ni Romualdez.
Nagtestigo si Dr. Rosalio Torres, team manager sang Cardinal Santos Medical Center, nahanungod sa pagka-confine ni Romualdez sa ospital.
Suno sa iya, nagtawag si Romualdez sa iya sang aga sang Setyembre 7 kag nagreklamo sang sakit sa dughan.
Bangud sini, ginpahanugotan ni Torres nga ma-confine sa ospital si Romualdez matapos ipahibalo sang cardiologist sang ospital nga si Dr. Rody Sy nga kinahanglan ini ma-admit kag ma-evaluate bangud ginakabig siya nga high risk sa cardiovascular complication.
Gin-admit si Romualdez sa Cardinal Santos Medical Center alas-4 sang hapon sang Setyembre 7.
Samtang, ginpangabay sang mga prosecutor sang Office of the Ombudsman sa Sandiganbayan nga tugutan ang mga independent doctor nga mag-usisa kag mag-assess sang kahimtangan sang ikaayong lawas ni Romualdez.
Apang nagpamatok ang prosecution sa motion ni Romualdez nga magpadayon sang iya confinement sa Cardinal Santos Medical Center kag ginapangabay nga ibutang siya sa kustodiya sang BJMP.
Samtang, ginpahayag sang Philippine National Police nga gin-deklarar sang mga doktor sang Cardinal Santos Medical Center si Romualdez nga medically unfit to travel antes sang hearing sang Sandiganbayan.
Ini ang nangin basehan sang iya medical condition samtang ginalauman ang hearing sang korte, apisar pa nga una na siya ginmandoan nga magtambong sa hearing.
