Ginduso ni Capiz Provincial Board Member Gilbert O. Ardivilla ang ordinansa nga naga-establisar sang official registry system para sa mga sugar farmers kag planters sa probinsya.
Katuyoan sini amo nga makahimo sang reliable kag updated nga database sang mga tawo nga yara sa sugarcane farming
Magabulig man ang registry sa provincial government nga makilala ang mga sugar farmers kag planters, ma-check ang ila impormasyon kag maka-plano sang maayo nga programa kag serbisyo para sa sugarcane industry.
Sa idalom sang ordinansa, ang Office of the Provincial Agriculturist amo ang madumala kag ma-maintain sang registry.
Buligan man ini sang municipal kag city agriculture offices, barangays, ang Department of Agriculture, Sugar Regulatory Administration, Department of Agrarian Reform, kag mga organisasyon sang farmers kag planters.
Ang registry ang lakipan sang basic information kaangay sang pangalan kag contact details sang farmer, farm location kag size, land ownership ukon legal basis para sa cultivation, farm production information, organization membership, kag government assistance nga una nga nabaton.
Wala sang baydan sa registration kag mangin available ini sa Office of the Provincial Agriculturist, municipal kag city agriculture offices, kag field registration activities.
