Ginakalipay sang Office of the Prosecutor (OTP) sang International Criminal Court (ICC) ang pagpagwa sang arrest warrant batuk kay Senador Ronald “Bato” Dela Rosa, nga opisyal na ginakabig nga suspek sa nagapadayon nga kaso sang crimes against humanity sa ICC.
Sa isa ka pahayag, ginpahayag sang OTP nga isa ka importante nga tikang ang nasambit nga warrant batuk kay Dela Rosa sa padayon nga pagpangita sang hustisya kag responsibilidad sa ginakabig nga mga krimen sa idalom sang war on drugs sa Pilipinas.
Suno sa OTP, ipapadayon sang ila opisina ang maid-id nga koordinasyon sa Registry kag sa tanan nga ahensya agud mapadali ang pagserbe sang warrant.
Ginpaathag pa sang Prosecutor nga ang sekreto nga arrest warrant ginpagwa sang Nobyembre 6, 2025, tatlo ka adlaw pagkatapos ma-file ang request.
Ini ang gilayon ginpahibalo sa mga otoridad sa Pilipinas.
Una diri, ginmando sang ICC Pre-Trial Chamber I ang pagbag-o sang status sang warrant halin “confidential” padulong “public.”
Matandaan nga si Dela Rosa gin-identify na sang ICC bilang isa sa mga co-perpetrator upod kay anay president Rodrigo Duterte sa kaso nga may kaangtanan sa crimes against humanity.
Suno sa OTP, base sa ila ebidensya, nakita sang Trial Chamber nga may “reasonable grounds” ukon bastante nga basehan nga si Dela Rosa, bilang anay Davao City Police Director kag naging PNP Chief, may responsibilidad sa ginapahayag mga pagpangpatay sa tion sang drug war sang Duterte administration.
