Indi dapat magpasilabot ang Senado kag ang Impeachment Court sa luyag sanday Senators Rodante Marcoleta kag Jinggoy Estrada nga makapartisipar sa impeachment trial ni Vice President Sara Duterte, suno kay Senator-Judge Panfilo “Ping” Lacson.
Suno kay Lacson, posible nga maghatag ini sang undue pressure sa Sandiganbayan kon ang Senado ukon Impeachment Court mismo ang maghulag agud tugutan ang duha ka senador nga makatambong sa Impeachment trial, bangud pareho ini nga may mga kaso nga plunder.
Pahayag niya, dapat halin mismo sa mga abogado nila Marcoleta kag Estrada ang bisan ano nga pangabay para makapartisipar ang duha sa impeachment trial.
Nagpadala si Marcoleta sang sulat kay Senate President Sherwin Gatchalian kag Presiding Officer Francis “Chiz” Escudero, agud ipahayag ang iya kinamatarong nga makaboto bilang senator-judge bisan pa nga yara siya sa detensyon bangud sa kaso nga plunder.
Samtang, ginbalibaran sang Sandiganbayan sang Hulyo ang pangabay ni Estrada nga makapartisipar sa impeachment trial.
Antes sini, nagpahayag na si Senate President Sherwin Gatchalian nga yara sa Sandiganbayan ang desisyon kon tugutan ukon indi ang duha niya ka kapwa senador nga makatambong sa trial.
Samtang, nagalaum si Lacson nga daku ang mabulig sa Impeachment Court sang mga amici curiae ukon “friends of the court” nga gin-imbitar agud maghatag sang ila opinyon parte sa voting threshold nga kinahanglan para sa conviction sa impeachment trial.
Suno kay Lacson, importante nga mabatian ang opinyon sang mga retirado nga mahistrado bangud wala sang isa ka tawo nga makasiling nga siya ang may bug-os nga ihibalo parte sa amo nga isyu sang voting threshold.
Pagkatapos sang hearing sa mga amici curiae, ginapaabot nga magaboto ang mga senator-judge sa motion for reconsideration ni Senator-Judge Erwin Tulfo batok sa nauna nga ruling nga nagtakda sang 16 ka boto, ukon two-thirds sang tanan nga miyembro sang Senado, nga kinahanglanon para sa conviction.
Suno kay Lacson, bag-o ini nga sitwasyon nga may mga senator-judge nga yara sa iban nga pungsod, nagapanago, yara sa detensyon ukon suspendido.
Ginpunto man niya ang posible nga problema kon siyam ka senator-judge ang indi na makaserbisyo ukon maka-ubra sang ila katungdanan, kag bangud sini indi na makompleto ang 16 ka boto nga kinahanglan para sa conviction.
Samtang, ginpahayag ni Lacson nga wala sang epekto sa impeachment proceedings ang panawagan ni Vice President Duterte nga mag-resign si President Ferdinand Marcos Jr.
Suno kay Lacson, ang mga pahayag sang bise presidente sa guwa sang impeachment trial nga wala sing kaangtanan sa apat ka impeachment articles indi dapat makaapekto sa paghearing kag pagdesisyon sang Impeachment Court.
