Pormal na nga nagsulat si Senate President Pro-Tempore Ping Lacson kay Senate President Vicente Sotto III agud i-anunsyo ang iya resignation bilang chairman sang Senate Blue Ribbon Committee nga naga-imbestigar sang mga maanomaliya nga mga flood control projects.
Sa sulat nga ginpadala kay Sotto, ginpahayag ni Lacson nga ang iya pagbiya sa pwesto ang gintunaan sang mga alegasyon kag pagkadismaya sang pila ka mga senador sa direksyon sang imbestigasyon sang komitiba.
Ginpahayag ni Lacson nga may pila ka mga kaupdanan sa Senado ang nagsiling nga daw kaangay nga ginapuntariya sang Blue Ribbon Committee ang pila ka mga senador samtang ginaalegar ginaprotektahan ang pila ka mga miyembro sang Kamara nga involved sa kontrobersiya sa mga flood control projects.
Ginpanindugan sang senador nga nagapabilin nga patas kag impartial ang imbestigasyon nga ginapatigayon sang iya komitiba kag ang basehan sini amo lamang ang ebidensya kag kamatuoran.
Dugang pa sini,wala sang political considerations ang iya ginhimo bilang head sang committee kag wala siya sang plano nga magpadalagan sa anuman nga posisyon matapos ang iya termino sa tuig 2031.
