Hugot nga ginpakamalaot ni House Ad Hoc Committee on Marawi Rehabilitation and Victims Compensation Chairman Zia Alonto Adiong, tiglawas sang Lanao del Sur ang pagdamo sang Filipino vloggers nga nagasunod sa kabutigan nga ginapalapta sang China sa isyu sang West Philippine Sea.
Suno kay Adiong, mga traidor ang ini nga mga personalidad sa social media kag indi nagakadapat nga tawgon nga Pinoy.
Ginpahayag ni Adiong nga nalipatan sang mga pro-China vloggers nga ang mga Pinoy ang apektado sang agresyon kag pressure sang Beijing sa West Philippine Sea.
Nagpanawagan si Adiong sa mga otoridad nga pasabton ang mga pro-China Filipino vloggers sa ila ginhimo.
Suno kay Adiong, wala sang problema kun ang isa ka tawo ang nagapaambit lamang sang opinyon angut sa nagakatabo sa West Philippine Sea.
Sa ginpatigayon nga House Tri-Com hearing sang Martes, ginpahayag sang mga opisyal sa Meta, nga anay Facebook, nga gin-aksyonan nila ang post sang blogger nga si Mark Lopez nga may yara sang sala nga impormasyon.
Ginapahayag sa post nga naggamit sang water cannon ang Pilipinas batok sa China Coast Guard sa West Philippine Sea.
