Nagapabilin sa gihapon sa signal no. 3 ang Southern portion sang probinsya sang Capiz bangud sang Bagyo Tino.
Sandig sa bulletin report sang Philippine Atmospheric, Geophysical, Astronomical Services Administration (PAGASA) subong nga alas-dos sang aga, kalakip sa mga kabanwahanan nga ginpaidalum sa nasambit nga wind signal amo ang banwa sang Tapaz, Mambusao, Jamindan, Dumalag, Dumarao, Cuartero, Dao, Panitan, Pontevedra, Sigma, President Roxas, Ma-Ayon, kag Pilar.
Suno sa report, makabatyag sang mabaskog nga hangin nga may pagmadlos nga yara sa 89 to 117 km/h sa sulod sang 18 oras nga mahimo makatuga sang kasarangan tubtob daku nga kahalitan sa kabuhi kag propedad.
Samtang ang nabilin nga bahin sang probinsya sang Capiz lakip na ang syudad sang Roxas ang yara sa signal no.2 kun sa diin makabatyag sang hangin nga may pagmadlos nga yara sa 62 to 88 km/h nga mahimo makatuga sang gamay tubtob kasarangan nga halit sa kabuhi kag propedad.
Padayon ang paghulag sang Bagyo Tino pa-westward sa kadasigon nga 30 km/h.
Nahibaluan nga una na ini nga naglandfall sa bahin sang Silago, Southern,Leyte subong nga aga.
Bangud sa storm signal, kanselado ang tanan nga klase sa publiko kag pribado nga buluthuan kag trabaho sa gobyerno sa bug-os nga probinsya sang Capiz.
Sa subong, nagapadayon ang pag monitor sang mga awtoridad sa posible pag-igo sang Bagyo Tino sa probinsya.
