-- ADVERTISEMENT --

Ginpaidalum sa 30 ka adlaw nga State of emergency ang sentro sang Lima kag ang probinsya sang Callao sa Peru agud magplano sang mga tikang batuk sa pagtaas sang krimen.

Ini ang gin-anunsyo ni Presidente Jose Jeri kasunod sang protesta sa diin isa ang napatay kag 100 ang ginreport nga napilasan.

Wala naman sang ginhatag nga dugang nga detalye ang presidente magluwas sa pagpadala sang pwersa sang militar kag pulis sa Lima kag Callao agud mapabilin ang seguridad kag kaluwasan sang publiko.

Nagsumpa naman si Jeri bilang bag-o nga Presidente sang Peru matapos ginpahalin si anay Presidente Dina Boluarte. Gilayon man siya nga nag-appoint sang bag-o nga gabinete sa diin ang mayor nga prayoridad amo ang pagtapna sang krimen.

Samtang, indi ini ang una nga kahigayunan nga gindeklara ang state of emergency sa Peru. Nahimo na ini ni Boluarte sang una, apang suno sa mga report, wala ini sang bastante nga epekto agud mabuhinan ang krimen.

-- ADVERTISEMENT --