Nagtaas sang 3.5 porsyento ang rice inventory sang pungsod sa masobra 2.2 million metric tons sadtong Hunyo ikumparar sang nagligad nga tuig suno sa Philippine Statistics Authority (PSA).
Ang PSA nagsiling nga ang mga stock sang bugas sa bug-os nga pungsod sang Hunyo 1 naglab-ot sa mga 2.24 million MT, 80,000 MT nga mas mataas sangsa 2.16 milyones MT nga narekord sa amo man nga panahon sang nagligad nga tuig.
Apang, ang pinakaulihi nga lebel sang imbentaryo sang bugas mas manubo sangsa nagligad nga bulan. Suno sa PSA, ang Hunyo nga stocks sang bugas mas manubo sang 2.9 porsyento ipaanggid sa 2.31 million MT nga imbentaryo ang narekord sang Mayo.
Ginpahayag sang PSA nga 44.7 porsyento sang stocks sang humay sang Hunyo ang naghalin sa mga panimalay, 36.4 porsyento ang naghalin sa komersyal nga sektor, kag 18.9 porsyento ang naghalin sa mga bodega sang National Food Authority (NFA).
Ang imbentaryo sang bugas sa mga panimalay naglab-ot sa one million MT samtang ang sa sektor sang komersyo kag NFA naglab-ot sa 814,390 MT kag 423,660 MT, sa magkatuhay.
Sa amo man nga report, ang PSA nagsiling nga ang mga stock sang mais sa bug-os nga pungsod sang Hunyo 1 nagnubo sang 13.2 porsyento year-on-year sa 651,960 MT gikan sa 750,760 MT.
Suno sa PSA, ang imbentaryo sang stock sang mais nakarekord sang bulan-sa-bulan nga pagnubo sang 2.9 porsyento kon ipaanggid sa lebel sang imbentaryo sang nagligad nga bulan nga 671,100 metriko tonelada.
Ginabanta 90.3 porsyento ukon 588,890 MT sang kabug-usan nga imbentaryo ang stocks sang mais sang Hunyo ang naghalin sa komersyal nga sektor, samtang ang nabilin nga 9.7 porsyento (63,070 MT) naghalin sa mga panimalay.
Sa tuigan nga basehan, ang mga stock sang mais sa sektor sang komersyo nagnubo sang 16.2 porsyento samtang ang mga yara sa mga panimalay nagtaas sang 30.8 porsyento.
