ROXAS CITY-Wala na sang plano pa ang pamilya nga pasakaan sang panumbungon ang suspek nga naglabo sa iya utod nga senior citizen sa Sitio Riverside, Barangay Ongol-Ilaya, Dumarao, Capiz.
Ginkilala ang biktima nga si Freddie Barquillo, 64-anyos sang nasambit nga lugar.
Sandig sa inisyal nga imbestigasyon sang Dumarao Municipal Police Station nagaguwa nga nagpauli sa ila nga panimalay ang biktima nga yara sa idalom sang impluwensiya sang makahulubog nga ilimnon.
Bangud diri, ginpakamaayo na lamang sang suspek nga si Rogelio Barquillo nga siradhan ang pirtahan agud indi sila mag-away nga mag-utod.
Apang ginapahayag nga ginsamad sang biktima ang pirtahan kag nagpilit sulod sa ila nga balay rason nga ginlabo ini sang suspek sang makatatlo ka beses sa iya nga ulo.
Gilayon naman nga nagsungka ang suspek sa Dumarao Municipal Police Station matapos ang insidente.
