PONTEVEDRA, CAPIZ – Gina-validate na sang Pontevedra Municipal Police Station ang ginaalegar mga criminal record sang isa sa mga suspek nga nagluthang-patay kay Police Captain Rian Ampoyos, myembro sang First Capiz Provincial Mobile Force Company.
Ang suspek amo si William Deocampo, 38 anyos kag residente sang Barangay Jolongajog, Pontevedra, Capiz.
Sa interview sang Bombo Radyo kay Police Captain Mark Anthony Garcia, hepe sang Pontevedra Municipal Police Station, iya ginpahayag nga base sa mga impormasyon nga iya nabaton, ginaalegar involve si Deocampo sa robbery incident sa Barangay Lawaan, Roxas City sa diin nanghold-up ini sang empleyado sang isa ka gasoline station sang 2022.
Suno kay Garcia, gina-usisa pa sa bulig sang mga mobile force company ang background kag record sang duha ka iban pa nga mga suspek nga tubtob subong wala pa makila-an.
Sa subong, padayon sa gihapon ang manhunt operation nga ginapatigayon sang otoridad.
