Nag-angkon sang pagkilala ang Tapaz Municipal Police Station bilang Top 3 Women and Children Protection Desks matapos ang ginpatigayon nga 14th PNP National Biennial Summit of Women in Community Policing 2026.
Ang ginpasidugan sa all-women WCPD team sanday Police Senior Master Sergeant Linnie Palomar Catorce, Police Staff Sergeant Ronamae Onato Gerafusco, Police Staff Sergeant Joyce Gasis Crazo, kag Police Corporal Rochelle Gicole Getiayon nga nagrepresentar kag nagbaton sang award para sa estasyon.
Sa nasambit nga pagkilala sang Soroptimist International of the Americas Philippines Region (A Foundation), Inc., sa pakig-angot sa Philippine National Police, nga may tema nga “Advancing Women in Policing through Excellence, Innovation and Inclusive Service Towards Safer and More Resilient Communities,” ang summit nagahatag importansya sa kahusayan, innocation, kag inklusibo nga pagserbisyo sang kababayen-an sa kapulisan agud mapalig-on ang seguridad kag kalinong sang komunidad.
Ginpahayag nga ang nasambit nga kadalag-an resulta sang dedikasyon, maayo nga pagserbisyo, kag wala untat nga pagpangabudlay sang mga katapo sang Tapaz MPS, sa pagpanguna ni Chief of Police PMAJ Gregg Anthony V. Salbang.
Dugang pa sa ompormasyon padayon nga ginatuman sang WCPD sang Tapaz MPS ang mandato sang PNP sa pagprotekta sang seguridad kag kinamatarong sang kababayen-an kag kabataan, lakip na ang paghatag sang nagakaigo nga proteksyon kag bulig sa mga nagakinahanglan.
Sa karon ginpasalamatan man sang Tapaz MPS ang padayon nga suporta sang PRO6, Capiz Police Provincial Office, Municipal Social Welfare and Development Office sang Tapaz, kag Lokal nga Panguluhan sang Tapaz.
