Natigayon nga makapauli sa Probinsya sang Capiz ang tatlo ka mga Capiznon gikan sa Middle East bangud man sa nagapadayon nga tensyon sa nasambit nga lugar.
Sa interview sang Bombo Radyo kay Mr. John Leo Marco D. Beldia, PESO Manager sang Probinsya sang Capiz, iya ginpahayag nga ang tatlo ka mga OFW nga nakapauli amo ang isa nga naga-ubra sa crew ship nga na-stranded ang barko rason nga nagdesisyon ang kompanya nga papulion sila, isa ka household worker nga ginbaklan sang iya nga amo sang ticket agud makapauli sa tion sang pag-umpisa sang tension kag ang isa naman ang nalakip sa 2nd batch sang repatration sang gobyerno.
Sa kabug-usan, masobra 7,000 ka mga OFWs gikan sa Capiz ang yara subong sa nagkalain-lain nga pungsod sa Middle East.
Sa nasambit nga numero, kapin sa 200 ang nagparehistro online kag nagpabutyag sang ila handom nga magpauli, samtang 98 naman ang yara sa ginakabig nga kritikal nga mga lugar.
Pahayag pa niya, pinakadamo ang yara sa United Arab of Emirates nga may 2000 ka mga OFW, Saudi Arabia nga may yara sang 1,500, Kuwait may yara sang 1,081 kag Iran nga may yara sang anum ka mga OFW.
Gin-athag man sini nga ang repatriation ang isa ka tikang sang National Government sa pagpanguna sang Department of Migrant Workers (DMW) kag Overseas Workers Welfare Administration (OWWA) agud mabuligan ang mga OFW nga nagatinir sa bahin sang Middle East.\
Dugang pa niya, ginalauman na nila ang possible pagsaka pa sang numero sang mga Capiznon nga OFW nga magapalista tuga sang padayon nga pagpamahog sang pagpangbomba sang Estados Unidos sang Amerika sa pungsod Iran.
Nagpahanumdom man ang natungdan sa tanan nga mga Capiznon nga magpabilin nga aligmat, magbantay sa mga abiso sang embahada sang Pilipinas kag proteheran ang kaugalingon sa tanan nga tion.
