TAPAZ, CAPIZ – Dakop ang tatlo ka senior citizen matapos nagpatigayon sang iligal nga pasugal sa Barangay Salong, Tapaz, Capiz.
Ginkilala ang mga nagkaladakpan nga sanday alyas Jose, 80-anyos, alyas Noel, 80-anyos kag alyas Pedro 79-anyos lunsay mga residente sang sang nasambit nga lugar.
Base sa impormasyon nga nagikan sa Tapaz Municipal Police Station, samtang nagapatigayon sang anti-illegal gambling operation ang mga katapo sang kapulisan, naaktuhan nga nagahampang sang iligal nga pasugal nga ginatawag “Tong-its” ang amo nga mga persona.
Narekober sa mga nagkaladakpan ang 1,075 nga bet money sa nagkalain-lain nga denominasyon; kag 1 ka set sang baraha.
Magapangatubang sang kaso nga paglapas sa Presidential Decree 1602 nga gin-amyendahan sang RA 9287 ukon ‘Anti-Illegal Gambling Law’ ang nasambit nga mga persona.
Sa karon, yara na sa kustodiya sang Tapaz PNP ang nasambit nga mga nagkaladakpan para sa nagakaigo nga disposisyon.
