SAPIAN, CAPIZ- Wala sang pagpamatok ang alkalde sang banwa sang Sapian, Capiz sa Executive Order No. 27 nga ginpapanaog sang Gobyerno Probinsyal natuhoy sa temporaryo nga pagsuspende sang renewal, under processed kag bag-o nga aplikasyon sang permit sang mga quarry kag mining companies.
Sa interview sang Bombo Radyo kay Mayor Joe Villanueva, alkalde sang nasambit nga banwa, iya ginpahayag nga welcome gid ang amo nga mandu sang Gobernador sa kada quarry companies.
Suno kay Villanueva, isa ka maayo nga tikang ang amo nga Executive Order agud maaksyunan ang kun ano man nga kinahanglan hatagan sang pagtamod sa pagpatigayon sang operasyon sang nasambit nga mga kompanya.
Pahayag niya, mahatagan man sang kahigayunan sa amo nga suspensyon ang pagpangusisa sa mga papeles kag dokumento sang mga nagapatigayon sang quarry.
Nahibaluan nga ang Executive Order No. 27 ang ginpapanaog bangud sa asud-asod nga mga bagyo kag pagbaha nga naeksperyensyahan sa probinsya.
Nagapanawagan naman ang natungdan sa mga pumuluyo nga magbuligay sa pag-atipan sang dunang manggad agud nga indi makaeksperyensya sang dako nga halit kasubong sang mga natabo sa iban nga mga lugar.
Interviewed by Bombo Francis Biñas
